Page 132 - Dissertation (3)

Цифрлық құралдар мен әлеуметтік желілерді тиімді пайдалану мәселесі де
респонденттер тарапынан бірнеше мәрте көтерілді (мысалы, R-3, R-7, R-9).
Мемлекеттік қызметшілердің бұл технологияларды меңгеру қабілетінің
төмендігі азаматтардың мемлекеттік органдарға деген сенімін әлсіретуі мүмкін
екендігі атап өтілді. Ұлыбритания мен Австралия мысалында онлайн
консультациялар мен нақты уақыттағы байланыс механизмдерін енгізу арқылы
мемлекеттік қызмет сапасын арттыруға болатыны көрсетілді [129, р. 3-45; 135].
Дағдарыстық жағдайларда коммуникация жүргізу дағдыларына қатысты
да маңызды мәселелер көтерілді. Зерттеуде Sakaki (2013) еңбегіне сүйене
отырып, дағдарыс кезінде жылдам әрі айқын ақпарат тарату – халықтың сенімін
сақтауда басты құрал екені көрсетілді [225, р. 155-175].
Кері байланыс пен азаматтардың қатысуын қамтамасыз ету –
коммуникациялық құзыреттіліктің тағы бір негізгі құрамдас бөлігі.
Респонденттер бұл процесті жақсарту үшін заманауи CRM жүйелері мен
автоматтандырылған талдау құралдарын енгізудің маңызын атап өтті.
Швециядағы бюджеттік процестерге азаматтарды тарту тәжірибесі осы
бағыттағы тиімділікті нақты дәлелдейді [105].
Сондай-ақ зерттеу мемлекеттік қызмет жүйесінде лауазымдар бойынша
нақты сараланған біліктілік талаптарын әзірлеудің маңызын көрсетті. Әсіресе
жоғары лауазым иелерінің стратегиялық коммуникация стратегияларын әзірлеп,
көпшілік алдында сенімді сөйлеу, БАҚ-пен жұмыс істеу, халықаралық
келіссөздер жүргізу сияқты дағдылары болуы тиіс екені баса айтылды. Мұндай
сараланған көзқарас тиімді басқаруды қамтамасыз етуге және мемлекеттік
органдарға деген сенімді нығайтуға мүмкіндік береді.
Жалпы алғанда, зерттеу нәтижелері мемлекеттік қызметшілерге арналған

кешенді оқыту бағдарламаларын әзірлеу, соның ішінде цифрлық сауаттылық,
дағдарыс жағдайындағы коммуникация, мәдениетаралық қарым-қатынас және
стратегиялық жоспарлау бойынша модульдерді енгізу қажеттігін айқындады.
Бұл Қазақстанның қазіргі мемлекеттік аппаратының кәсібилігін арттыруға және
азаматтармен сындарлы диалог құру арқылы «Халық үніне құлақ асатын
мемлекет» қағидатын іске асыруға елеулі үлес қосады.

132