Page 56 - Академикалы? саясат РУС.

2 ТҮРКІСТАН ҚАЛАСЫНДА «АҚЫЛДЫ ҚАЛА»
ТҰЖЫРЫМДАМАСЫН ІСКЕ АСЫРУДЫҢ МЕМЛЕКЕТТІК РЕТТЕУ
ТЕТІКТЕРІН ТАЛДАУ

2.1 Ақылды қала жобасын іске асырудың институционалдық-
құқықтық негіздері және оның ағымдағы жағдайы

Қазақстанда «ақылды қала» тұжырымдамасының институционалдық
дамуына ресми серпін 2018 жылғы 10 қаңтардағы Қазақстан Республикасы
Президентінің «Төртінші өнеркәсіптік революция жағдайындағы дамудың жаңа
мүмкіндіктері» атты Жолдауынан кейін берілді. Аталған құжатта қалалық
шаруашылықты цифрлық трансформациялау үдерісін біріздендіру мақсатында
«ақылды қалалардың» эталондық стандартын әзірлеу жөнінде нақты тапсырма
жүктелді. Осыған сәйкес, Қазақстан Республикасының Цифрлық даму,
инновациялар және аэроғарыш өнеркәсібі министрлігі 2020 жылғы 27
қарашадағы № 436/ОД бұйрығымен Smart City қалыптастырудың әдістемелік
ұсынымдарын (эталондық стандарт) бекітті [5, б. 8].
Аталған стандартта смарт-инфрақұрылымды жобалау, енгізу және басқару
қағидаттары жүйеленіп, «ақылды қалалар» үшін басымдық берілетін қалалық
өмір салалары айқындалған. Атап айтқанда, бұл бағыттар – қоғамдық қауіпсіздік,
көлік, тұрғын үй-коммуналдық шаруашылығы, әлеуметтік сала, білім беру,
денсаулық сақтау және қалалық басқару болып табылады. Қазақстан аумағында
іске асырылып жатқан барлық Smart City жобалары осы салалардағы

көрсеткіштерді жақсартуға бағытталған және олардың барлығы Тұрақты даму
мақсаттарына (ТДМ) қол жеткізу міндеттерімен үйлестірілген. Осы тұрғыдан

алғанда, эталондық стандарт барлық өңірлер үшін, соның ішінде Түркістан
қаласы үшін де, «ақылды» көрсеткіштер мен қалалық ортаны дамытудың
мақсатты индикаторларын біріздендіретін нормативтік-әдістемелік база ретінде
қызмет атқарады.
Өңірлік және жергілікті деңгейлерде Smart City тұжырымдамасын іске
асыру Түркістан облысы әкімдігінің стратегиялық және бағдарламалық
құжаттарына негізделеді. Түркістан қаласы өңірлік тұрақты даму моделін
қалыптастыру және цифрлық трансформацияны жүйелі түрде жүзеге асыру
мақсатында пилоттық аймақ ретінде айқындалған. Осы мәртебе аясында қаланы
цифрлық жаңғырту бойынша жол карталары мен өңірлік бағдарламалар
әзірленіп, іске асырылуда. Атап айтқанда, «Smart City Turkistan» өңірлік
тұжырымдамасы қабылданып, онда қаланы цифрлық дамытуға бағытталған
басым және қосымша стратегиялық бағыттар нақтыланған.
Аталған бастамаларды институционалдық және әкімшілік деңгейде іске
асыру үшін Түркістан облысының цифрландыру, мемлекеттік қызметтер көрсету
және архивтер басқармасы өз құзыретінің шеңберінде маңызды рөл атқарады.
Бұл басқарманың қызметі Түркістан облысы әкімдігінің 2024 жылғы 5
қыркүйектегі №178 қаулысы негізінде бекітілген «Түркістан облысының
цифрландыру, мемлекеттік қызметтер көрсету және архивтер басқармасы»
мемлекеттік мекемесі туралы Ережеде нақты регламенттелген [111].

56