Академия
жаңалықтары

Мемлекет басшысы өз Жолдауында Қазақстанды толыққанды цифрлық мемлекетке айналдыру және жасанды интеллектіні ел дамуының негізгі драйвері ретінде дамыту стратегиялық басымдық екенін атап өтті.

Осы бағытты іске асыру аясында Қазақстан Республикасы Президентінің жанындағы Мемлекеттік басқару академиясы мен Astana IT University (AITU) өзара ынтымақтастық туралы меморандумға қол қойды.

Аталған серіктестік білім беру мен ғылымды дамытуға, мемлекеттік қызметшілер мен профессор-оқытушылар құрамының біліктілігін арттыруға, сондай-ақ бірлескен білім беру және ғылыми-зерттеу жобаларын іске асыруға бағытталған. Сонымен қатар заманауи цифрлық технологияларды басқару практикасына енгізу көзделіп отыр. Тараптар қос дипломды білім беру аясындағы ынтымақтастыққа, оның ішінде «Цифрлық мемлекеттік басқару» білім беру бағдарламасы бойынша жұмысқа ден қоймақ.

Атап өтейік, Мемлекеттік басқару академиясының базасында ҚР Мемлекеттік қызмет істері агенттігінің тапсырмасымен Қазақстанда баламасы жоқ жасанды интеллект зертханасы құрылды. Бұл зертхана мемлекеттік сектор үшін интеллектуалды шешімдерді әзірлеу, сынақтан өткізу және енгізу бойынша құзыреттер орталығына айналады.

Қазақстан Республикасының Президенті Қасым-Жомарт Тоқаев «Қазақстан жаңғырудың жаңа кезеңіне қадам басты» деген тақырыпта «Turkistan» басылымына берген сұхбатында: «Отаншылдық деген ұлы сезім жылтырақ сөзбен, жалған әрекетпен бағаланбауға тиіс… Отаншыл болу – туған еліңнің, отбасыңның игілігі үшін аянбай еңбек ету деген сөз», – деп атап көрсетті. Осы ретте Мемлекет басшысы «Азияда «заң мен тәртіпке бағынып, береке-бірлікте, тату-тәтті өмір сүрудің «үлгілі үйлесімі» барын» өзгеше  бағалады.

Адамзат қоғамының сан ғасырлық тәжірибесінің нәтижесі, заң мен тәртіпке негізделген моральдық, этикалық нормаларының үйлесімді синергиясы, эстетикалық пәлсапа заңдылықтары, ұлттық-мәдени құндылықтар әлемі – барлығы тоғыса келе «құқықтық мемлекеттің іргетасын, азаматтардың қоғамдық және жеке қауіпсіздігінің алғышартын», отаншыл рухтың бастауын қалайтыны сөзсіз. Оған Қазақстан Республикасы Президентінің 2025 жылғы 5 қарашадағы №1081 Жарлығымен бекітілген «Қазақстан Республикасы Ішкі саясатының негізгі қағидаттары, құндылықтары мен бағыттары» дәлел бола алады. Нәтижесінде қоғам, мәдениет, сaна ұғымдарының төрелігінен бастау алған «адамтану» мен «тұлғатану» сияқты іргелі ілімдер маңызды әрі мүдделі басымдықтар үйлесімі деп қабылдануда.

Бүгін «Қазақстан азаматы қандай болу керек? Еліміздің басты тірегі не? Миссиясы қандай?» деген сұрақтар төңірегінде өрбіген тұжырымдар Қасым-Жомарт Тоқаевтың Ұлттық құрылтай жиналысында белгілеп берген бағдарымен сараланып отыр. Мемлекет басшысының «Әділетті Қазақстанды Адал азаматтар құрады. Бұл – бір-бірімен өте тығыз ұғымдар… Отаншылдық, адамгершілік, білімпаздық, нағыз маман болу, үнемшілдік, еңбекқорлық, ел мен жерге жанашырлық сияқты асыл қасиеттер бәрінен биік тұруға тиіс. Осындай ізгі қасиеттің бәрін бойына сіңірген жанды Адал азамат деген бір ауыз сөзбен сипаттауға болады» деген тұжырымды ойлары «жаңа қоғамдық этика», «азаматтардың өзара тілектестігі», «сенім мен жауапкершілік», «парасаттылық пен адамгершілік», «адал табыс», «арлы адам», «қоғамдық ізгілік» сияқты бірқатар мағыналы да мазмұнды ұстанымдарға басымдық беруімен өзектелуде.

«Мойындағы борышты білу – білім ісі, борышты төлеу – адамшылық ісі», – деп  қазақтың көрнекті ғалымы, ағартушы А. Байтұрсынұлы атап өткендей, «тарих – төреші, уақыт – сыншы» заманда пайымы мен танымы тереңнен өрбитін құндылықтар қатарын «қоғамымыздың болмысы мен бет-бейнесін түбегейлі өзгертер» «тарихи мүмкіндіктер» мен «цифрлық өзгерістер», салалық дамудың «тың серпіндері», адам мен оның өмірі, құқықтары мен даму кеңістігі, рухани болмысы мен ішкі сенімі нақтылар. Осыған орай, Қасым-Жомарт Тоқаевтың БҰҰ Бас Ассамблеясының 80-ші сессиясындағы Жалпы дебатта белгілеп берген «қауіпсіздік архитектурасын қалпына келтірер» «саяси көшбасшылықтың» нысаналы индикаторлары да, «мемлекет басшыларының бейбітшілікке ұмтылу жолындағы» жаһандық міндеттері де, «жаңғыру саясатының» берік қағидаттары да Қазақстанның дамуындағы «ауқымды саяси өзгерістердің» құнды бастауларын, тұжырымды белестерін айқындары сөзсіз.

Мемлекет пен ел болашағы өз міндетін зор сеніммен арқалаған азаматтардың үлесімен, ертеңгі күннің аманатын пайымдай білген қоғам мүшесінің терең түсінігімен өлшенеді. Бұл қатарда білім беру ордалары мен кәсіби даму орталықтарының алдында тұрған іргелі мақсат адамның зияткерлік қабілетін азаматтық келбетімен, отаншыл рухымен, құндылықтар көкжиегімен, жоғары пәлсапалық ұғымдар тоғысымен сабақтастыра келе, дарынды ұрпақ, ойлы да адал азамат тәрбиелеу деп түсінген маңызды.

Қазақстан Республикасының Президенті жанындағы

Мемлекеттік басқару академиясының

Академиялық қызмет жөніндегі вице-ректоры  Э. Н. Оразалиева

Академия 2025 жылғы 13 желтоқсанда Білім беру сапасын қамтамасыз ету жөніндегі тәуелсіз агенттіктің (IQAA) Аккредиттеу кеңесінің шешімімен 5 жыл мерзімге институционалдық аккредиттеу рәсімінен сәтті өтті.

IQAA – білім беру ұйымдары мен білім беру бағдарламаларының сапасын бағалау саласындағы Қазақстандағы алғашқы коммерциялық емес үкіметтік емес ұйым.

Академияның институционалдық аккредиттеуден өтудегі басты мақсаты халықаралық ESG сапа стандарттарына сәйкестігін растау болды. Себебі IQAA аккредиттеу стандарттары «Еуропалық жоғары білім беру кеңістігінде сапаны қамтамасыз ету стандарттары мен нұсқаулықтарына» (ESG) сәйкес әзірленген және білім беру ұйымдарында ішкі сапаны қамтамасыз етуге арналған.

Сапаның халықаралық деңгейде мойындалуы тиісті салалардағы жоғары оқу орындарының білім беру бағдарламалары арасында ынтымақтастық орнатуға мүмкіндік береді. Бұл, өз кезегінде, білім алушылар мен профессор-оқытушылар құрамының академиялық ұтқырлығын дамытуға, бірлескен білім беру бағдарламаларын әзірлеуге, қос дипломды білім беру бағдарламаларын ұйымдастыруға, ортақ ғылыми зерттеулер жүргізуге және басқа да бағыттарды іске асыруға жол ашады.

2025 жылғы журналдың қорытынды саны жаһандық трансформация жағдайындағы мемлекеттік басқару, экономика және халықаралық қатынастардың өзекті мәселелеріне арналған. Ұсынылған ғылыми зерттеулерде институционалдық сенім, мемлекеттік қызметтің тиімділігі, мемлекеттік органдардың коммуникациялық қызметі, сондай-ақ жария басқару жүйесіне цифрлық және зияткерлік технологияларды енгізу мәселелері қарастырылады.
Экономикалық даму аспектілеріне ерекше назар аударылып, құрылымдық өзгерістер, цифрлық мемлекеттік басқару, мемлекеттік-жекешелік әріптестік жобаларын қаржыландыру, әлеуметтік мобильділік және ресурстарды тұрақты басқару мәселелері талданады. Авторлар Қазақстан Республикасының ұлттық тәжірибесімен қатар, халықаралық озық тәжірибелерге де талдау жасайды.
Халықаралық қатынастар бөлімі стратегиялық әріптестік, энергетикалық дипломатия, жаһандану жағдайындағы ұлттық бірегейлік, көлік-логистикалық әлеует, киберқауіпсіздік және климаттық құқықты дамыту мәселелерін қамтиды. Жарияланымдар өңірлік және жаһандық үрдістерді көрсетіп, зерттеушілер, тәжірибешілер және мемлекет пен қоғамның даму мәселелеріне қызығушылық танытатын оқырмандар үшін құнды болып табылады.
Журнал редакциясы барлық оқырмандар мен авторларды келе жатқан Жаңа жылмен құттықтап, жаңа мақалалар мен ғылыми ынтымақтастықты асыға күтеді.

Бүгін «Даму күні» аясында Дипломатия институтының «Diplomatic Talks» тіл клубы аясындағы кезекті кездесу өтті. Бұл жолғы пікірталас «The use of robots in international events and everyday life» тақырыбына арналды. Іс-шараның модераторы, MIR-2025 тобының магистранты Сагизбаев Рустем, қатысушыларды белсенді диалогқа тартып, тиімді пікір алмасу алаңын қалыптастырды.

Кездесу барысында қатысушылар робототехниканың қазіргі даму деңгейін, оның халықаралық іс-шараларды ұйымдастырудағы рөлі мен әлеуетін, сондай-ақ инновациялық технологиялардың күнделікті өмірге ықпалын жан-жақты талқылады.

Осындай форматтағы кездесулер тыңдаушылардың ағылшын тілінде еркін сөйлеу дағдыларын жетілдіруге, кәсіби лексиканы тәжірибеде пайдалануға, сөздік қорын кеңейтуге, сондай-ақ сыни және сараптамалық ойлау қабілеттерін дамытуға ықпал етеді. Дипломатия институты алдағы уақытта білім алушылардың тілдік және кәсіби құзыреттерін арттыруға бағытталған бастамаларды жалғастырады.

Академияда ұлттық зерде мен стратегиялық ойлауды ұштастыратын ерекше форматтағы Швейцариялық жүйе үлгісі бойынша ұйымдастырылған тоғызқұмалақ сайысы өтті. Зияткерлік додаға Академияның 24 магистранты мен қызметкерлері қатысты. Әр қатысушы түрлі жеті тур бойы бір бірімен алмаса ойнап, стратегиялық талдау мен тактикалық дәлдікті талап еткен шынайы ойын көрсетті. Швейцариялық жүйе жарыс динамикасын арттырып, әр турды жаңа мүмкіндіктер мен күтпеген шешімдерге толы әсерлі кезеңге айналдырды.

Қатысушылар логикалық ойлау қабілеттерін, талдау шеберлігін және интеллектуалдық ептілігін көрсетіп, ойын барысында нақты есептеулерге, батыл стратегияларға және шебер тактикалық қадамдарға жүгінді. Көрермендер үшін әр партия тосын бұрылыстарымен, жеңіске жетелейтін айла-тәсілдермен интригаға толы сәттерімен есте қалды. Тоғызқұмалақты ұлттық құндылық ретінде дәріптеу және оны заманауи форматта көпшілікке ұсыну шараның басты жетістіктерінің бірі болды. Жарыс қорытындысында үздік нәтиже көрсеткен қатысушылар марапатталып, өздерінің жоғары шеберлігін дәлелдеді. Бұл шара Академиядағы зияткерлік мәдениетті дамытудың, ұжымдық бірлікті нығайтудың және ұлттық ойындарды қолдаудың айқын көрсеткіші.

Даму күні аясында «Қыран» зияткерлік дебат клубының кезекті отырысы өтті. Іс-шараға Экономика, Өңірлік даму және HRM мамандықтарының магистранттары қатысып, жасанды интеллектінің қоғам өміріндегі орнына қатысты маңызды мәселелерді талқылады. Атап айтқанда, жасанды интеллектінің адам өмірінің сапасын жақсартудағы рөлі, денсаулық сақтау, білім беру және көлік салаларындағы мүмкіндіктері, экономиканы жеделдету әлеуеті, сондай-ақ адамның қабілеттерін толықтыру немесе алмастыру мүмкіндігі секілді сұрақтар жан-жақты қарастырылды. Командалардың пікірталас мәдениеті, аналитикалық ойлау деңгейі және өз көзқарастарын жүйелі әрі дәлелді түрде жеткізе білуі көрермендер мен қазылар алқасының жоғары бағасына ие болды. Отырыс қорытындысында үздік аргументация, тиімді стратегия және ораторлық шеберлік бойынша ең мықты қатысушылар анықталды. Барлық көрсеткіштер бойынша үздік нәтиже көрсеткен Экономика мамандығының магистранттары ¼ финалға жолдама алды.

«Қыран» зияткерлік дебат клубы алдағы уақытта да осындай мазмұнды шараларды ұйымдастыра отырып, магистранттардың сыни ойлау қабілетін, көшбасшылық қасиеттерін және заманауи мәселелерге қатысты азаматтық позициясын қалыптастыруды жалғастырады.

Академияда «Қазақстандағы мемлекеттік басқару жүйесіне климаттық саясатты интеграциялау» тақырыбында қоғамдық-саяси диалог өтті. Шараны «Green Academy» Ғылыми-білім беру орталығы ҚР Экология және табиғи ресурстар министрлігімен бірлесіп, Астана қаласының Қоршаған орта және табиғат пайдалануды қорғау басқармасының, FAO жобасы, SIPA/IDDRI (Франция) қолдауымен ұйымдастырды.

Іс-шараның мақсаты – Бразилияның Белен қаласында өткен БҰҰ-ның Климаттың өзгеруі жөніндегі негіздемелік конвенциясы тараптары конференциясының (COP30) қорытындыларын талқылау және климаттық саясаттың қағидаттарын Қазақстан Республикасының стратегиялық жоспарлау және мемлекеттік басқару жүйесіне интеграциялау бойынша ұсынымдар әзірлеу.

Іс-шараға мемлекеттік органдардың өкілдері, депутаттар, қоғамдық ұйымдардың өкілдері, сондай-ақ Қазақстан Республикасы Президентінің жанындағы Мемлекеттік басқару академиясының магистранттары мен докторанттары қатысты.

Қатысушылар 2060 жылға дейін көміртегі бейтараптығына жету стратегиясын тиімді жүзеге асыру үшін мемлекеттік органдар, бизнес және халықаралық ұйымдар күштерін біріктірудің маңыздылығын атап өтті. Диалог барысында әзірленген ұсыныстар (“Ангел” ҚБ директоры, Людмила Петрова) Қазақстан Республикасының Үкіметіне жолданатын болады. Ұсыныстар 2025 жылғы 10 желтоқсанға дейін қабылданады.

Бүгін Даму күні аясында “Қыран” зияткерлік дебат клубының III маусымы ресми түрде ашылды. Алғашқы пікірталас «Мемлекет экономикадағы рөлін күшейтуі керек пе, әлде нарыққа көбірек еркіндік беруі керек пе?» тақырыбында өтті. «Экономика» және «Өңірлік даму» командалары экономикалық даму моделдерін жан-жақты талдап, салмақты аргументтер ұсынды.

III маусым ойындары — интеллектуалдық алмасу, көшбасшылық дағдыларды дамыту және пікірталас мәдениетін нығайту алаңы ретінде қызмет ететін болады.

Даму күні аясында «EOSpatial» ЖШС директоры, қашықтықтан зондтау саласындағы компаниялар қауымдастығының мүшесі Абзал Жамаловпен кездесу өтті.

Спикер “Мемлекеттік басқару жүйесінде ғарыштық мониторинг технологияларын қолданудың заңнамалық негіздері” тақырыбында дәріс оқыды.  Абзал Жамалов ғарыштық мониторингтің елімізде дамуы мен қолданылу мүмкіндіктері туралы қызықты ақпараттармен бөлісті. Жиында ғарыштық технологияларды мемлекеттік басқаруда тиімді пайдалану жолдары, заңнамалық жаңалықтар мен болашақта жүзеге асырылатын жобалар талқыланды.

Қатысушылар белсенді түрде сұрақтар қойып, тәжірибелі маманнан маңызды кеңестер алды. Ғарыштық мониторинг — болашақтың технологиясы!

Бүгін Академияда Магистранттар мен докторанттар кеңесінің ұйымдастыруымен Күзгі бал кеші өтті. Мерекелік кеште білім алушылар өнер көрсетіп, вальс биледі. Қазылар алқасының шешімімен байқауға қатысушы 7 жұп түрлі номинациялар бойынша марапатталды.

“Күзгі бал Ханзадасы мен Ханшайымы” МРР-25 магистранттары Даниярбек Нурсеитов пен Әсел Қадырбаева атанды.

“Көрермен көзайымы” номинациясымен МРР-25 білім алушылары Жаксыбеков Жигер мен
Рахматалиева Айнұр марапатталды.

“Сахна жұлдыздары жұбы” номинациясын MRD-25 тобының Скаков Ербол мен Айтымбет Гүлназ иеленді.

“Сән мен сұлулық иесі” MRD – 25 тобынан Өсербай Сағадат пен Ахметова Тәж атанды.

“Ең әдемі жұп” номинациясымен MIR-25 магистранттары Табанов Архат мен Смәділ Марал марапатталды.

“Ең жарасымды жұп” MHRM-25 тобынан
Жумагалиев Дамир мен Тулепбергенова Айгерим атанды.

“Ең өнерлі жұп” номинациясын МЕ-25, МRD-25 магистранттары Айекешов Жигер мен Куатова Асель марапатталды.

Жеңімпаздарды шын жүректен құттықтаймыз!

Бүгін Ақордада Қазақстан Республикасы Президентінің жанындағы Мемлекеттік басқару академиясы мен Армения Республикасы Сыртқы істер министрлігінің Дипломатиялық мектебі өзара ынтымақтастық туралы келісімге қол қойды.

Келісім дипломатиялық кадрларды даярлау, олардың біліктілігін арттыру, сондай-ақ сыртқы саясат, халықаралық қатынастар, халықаралық құқық және халықаралық экономика бағыттарында бірлескен білім беру және ғылыми жобаларды дамытуға бағытталған.

Ынтымақтастық аясында тараптар оқу материалдарымен, ғылыми жарияланымдармен алмасады, оқытушылардың кәсіби дамуын қолдайды, конференциялар мен дөңгелек үстелдерге қатысуды қамтамасыз етеді. Сонымен қатар, бірлескен зерттеулер мен оқу бағдарламаларын жүзеге асыру жоспарлануда.

Бүгін «Даму күні» аясында Дипломатия институтының «Diplomatic Talks» тіл клубының кезекті кездесуі өтті. Кездесу тақырыбы «Digitalisation and Cinematography» болып, онда цифрлық технологиялардың қазіргі киноиндустрияға әсері мен медиаконтенттің трансформациясы мәселелері талқыланды. Іс-шараның модераторы ретінде MIR-2025 тобының магистранты Сарман Алан сөз алып, қатысушылардың белсенді пікір алмасуын қамтамасыз етті.

Дипломатия институтының магистранттары диалогқа белсенді қатысып, өз пікірлерін білдірді және цифрландырудың кинематографқа әсерін халықаралық қатынастар тұрғысынан талдады. Кездесудің жалпы атмосферасы коммуникативтік дағдыларды, сыни ойлау қабілеттерін және кәсіби ағылшын тілін дамытуға ықпал етті.

«Даму күні» аясында Дипломатия институтының аға оқытушысы Мариям Калмақанқызы Нурсапинова «English for Pleasure» клубының кезекті отырысын өткізіп, оған MHRM-25 тобының магистранттары қатысты.
Кездесу кәсіби ағылшын тілі сабақтарында өтілген тақырыптар бойынша сөйлеу дағдыларын дамытуға, сөздік қорды кеңейтуге және грамматикалық білімді бекітуге бағытталған «Lightning Quiz» ойын-викторинасы форматында өтті. Магистранттар интерактивті тапсырмаларды белсенді орындап, ағылшын тілін тәжірибеде қолдана отырып, командалар арасында сайысты. Кездесудің жылы әрі шығармашыл атмосферасы еркін қарым-қатынасқа және тілді меңгеруге деген мотивацияның артуына ықпал етті. Ойын соңында қатысушыларға ынталандыру сыйлықтары табысталды. Академия магистранттары үшін мазмұнды әрі шабыт сыйлаған кездесу өтті!

Бүгін Академияда Мемлекет және қоғам қайраткері Бектұрғанов Ерсұлтан Өтеғұлұлы магистранттарға арналған тағылымды қонақ дәрісін өткізді. Дәріс барысында Ерсұлтан Өтеғұлұлы мемлекеттік қызметтің мәні мен миссиясын терең түсіндіріп, қызметтік құндылықтардың маңызын жан-жақты ашып көрсетті. Ол адалдық, жауапкершілік, әділдік, кәсіби ұстамдылық және қоғам мүддесіне қызмет ету қағидалары мемлекеттік қызметшінің болмысын айқындайтын басты өлшем екенін атап өтті. Бұл құндылықтардың қағаз жүзіндегі талап емес, азаматтардың сенімін қалыптастыратын күнделікті тәжірибелік нормалар екеніне ерекше тоқталды.

Сонымен қатар, дәріс мотивациялық мазмұнымен ерекшеленді. Ерсұлтан Өтеғұлұлы өзінің бай кәсіби жолындағы қызықты әрі тағылымды оқиғаларымен бөлісіп, мемлекеттік қызметте кездесетін күрделі жағдайлардан қалай дұрыс шешім қабылдау керектігі туралы нақты мысалдар келтірді. Оның әңгімелері жас мамандарға жігер беріп, күрделі сәттерде кәсіби ұстаным мен адамгершілік қасиетті жоғалтпау маңызды екенін тағы бір мәрте дәлелдеді. Кездесу магистранттардың кәсіби көкжиегін кеңейтіп, мемлекеттік қызмет құндылықтарына деген түсінігі мен құрметін тереңдете түсті.

Даму күні аясында Экономист+ пікірталас алаңында «Әкімшілік өндірістегі басқарушылық шешімдер қабылдау тетіктеріне жасанды интеллектіні интеграциялау» тақырыбына арналған ғылыми семинар өтті. Семинар «Мемлекеттік басқару» бағдарламасының докторанты Бакенова Айгерім Қанатқызының әкімшілік өндіріс саласында ЖИ негізіндегі басқарушылық шешімдер қабылдау тетіктерін зерттеуге бағытталған диссертациялық жұмысы аясында ұйымдастырылды. Іс-шараға әкімшілік құқық және әкімшілік іс жүргізу саласының сарапшылары, соның ішінде сот төрағасы мен судьялар, ҚР Жоғары сот кеңесінің, ҚР Әділет министрлігінің және Жоғарғы Соттың Сот әкімшілігінің өкілдері, төрешілер, MNU ғалымдары және Академияның профессор-оқытушылар құрамы қатысты.

Кездесу барысында қатысушылар басқарушылық шешімдерді қолдауда және дауларды шешуде жасанды интеллектіні практикалық қолдану мәселелерін талқылады. Зерттеушілер мен практиктер арасындағы диалог мемлекеттік органдардың тиімділігін арттырып, қоғамға пайда әкелуге қабілетті ЖИ-ді енгізудің негізгі бағыттарын айқындауға мүмкіндік берді. Ұйымдастырушылар семинар қатысушыларына ғылыми пікірталастың жоғары деңгейі, конструктивті ұсыныстар және зерттеу тақырыбына көрсеткен зор қызығушылықтары үшін ерекше алғыс білдіреді. Мұндай шаралар мемлекеттік басқару процестерінде қолданбалы міндеттерді шешу мақсатында ғылым мен тәжірибенің бірігуінің маңыздылығын дәлелдейді.

Академия делегациясы Гонконгта өткен қалалық басқару, инновациялар және аймақаралық ынтымақтастық мәселелеріне арналған халықаралық «Urban Governance and Innovation Conference» конференциясына қатысты. Шараға мемлекеттік органдардың, халықаралық және жеке ұйымдардың өкілдері, сондай-ақ Гонконг, Қытай, Индонезия, Тайланд, Грузия, Испаниядан келген жетекші ғалымдар мен мамандар қатысты.

Конференция қалалық басқару мен инновациялық дамудың теориясы мен тәжірибесін кейс-стадилер, аналитикалық талқылаулар және ғалымдар мен мамандар арасындағы тәжірибе алмасу арқылы дамытуға бағытталды. Форумның негізгі мақсаттарының бірі – мемлекеттік және қалалық басқару саласындағы мамандардың әлеуетін арттыруға ықпал ету.

Академия ректоры А. Жолманов «Public Administration Transformation in Central Asia and the Caucasus: Challenges, Innovations and Regional Collaboration» тақырыптық сессиясында баяндама жасап, Қазақстандағы мемлекеттік басқаруды трансформациялау мәселелерін таныстырып, мемлекеттік қызметшілерді кәсіби даярлау, олардың кәсіби дамуын қамтамасыз ету және үздіксіз оқыту бағыттарындағы Академияның рөлін атап өтті.

Форум барысында Академия мен Гонконг қалалық университеті арасында ынтымақтастық туралы меморандумға қол қойылды. Құжат академиялық алмасуды, ғылыми ынтымақтастықты дамыту және бірлескен білім беру мен зерттеу бағдарламаларын іске асыруды көздейді.

Бүгін Академияға ҚР Ішкі істер министрлігінің Басқару академиясының делегация Даму күні аясында өткен шараларға қатысты. Екіжақты меморандум аясында Академияға арнайы экскурсия жасалды, дәрістер легі ұйымдастырылды.

Даму күні аясында алғашқы дәрісті Академияның вице-ректоры, филология ғылымдарының докторы, профессор Оразалиева Эльмира Нұрланқызы адамның тұлғалық болмысы, қоғамдағы рөлі, мемлекеттік қызметтегі жауапкершілік мәдениеті және ұлттық құндылықтардың маңызы терең талқыланды.

Академияның Қоғаммен байланыс секторының коммуникациялар жөніндегі бас сарапшысы Дана Ғазиз көпшілік алдында еркін сөйлеу дағдыларын дамытуға арналған практикалық тренинг өткізіп, магистранттардың коммуникативтік қабілеттерін жетілдіру бойынша тиімді әдістермен бөлісті.

Экономика ғылымдарының докторы, PRINCE2®️ аккредиттелген жаттықтырушысы Жанболат Даухарин «Трансформация 360 – үздіксіз даму» тақырыбында дәріс өткізіп, өзгерістерді басқару, жобалық ойлау және кәсіби өсу стратегиялары жөнінде құнды тәжірибесімен бөлісті.

Мұндай кездесулер Академиялар арасындағы академиялық және кәсіби байланысты нығайтып қана қоймай, білім алушылардың көзқарасын кеңейтіп, жаңа бастамалар мен тиімді тәжірибелердің қалыптасуына жол ашады.

«Даму күні» аясында «Diplomatic Тalks» тіл клубының кезекті кездесуі өтті. Тақырыбы – «Digitalisation and Payment System», Қазақстандағы цифрлық мемлекеттік қызметтерді енгізу және дамыту мәселелеріне арналды. Дипломатия институтының магистранттары елдің цифрлық трансформациясының негізгі бағыттарын, мемлекеттік басқаруда инновациялардың рөлін, сондай-ақ заманауи дипломатия мен халықаралық ынтымақтастықтағы цифрлық технологиялардың маңызын талқылады. Цифрлық сауаттылықты арттыру бойынша идеяларымен бөлісіп цифрлық қызметтерді жетілдіру жолдарын қарастырды және заманауи технологиялардың тиімді дипломатиялық тәжірибедегі рөлін талқылады.

2025 жылғы 13 қараша күні Қазақстан Республикасы Президентінің жанындағы Мемлекеттік басқару академиясында қаржыгерлер күніне орай «Қазақстан Республикасының фискалдық және монетарлық саясатының жаңа тәсілдері» тақырыбында дөңгелек үстел өтті. Іс-шара пікірталас клубы «Экономист+» алаңында сараптамалық сессия форматында ұйымдастырылды.

Кездесу барысында қатысушылар фискалдық және ақша-несие саясатын қалыптастыру мен іске асырудың заманауи тәсілдерін, сондай-ақ қаржы, салық-бюджет және монетарлық бағыттардың өзара үйлесімін арттыру жолдарын қарастырды. Сарапшылардың пікірінше, экономикалық саясатты тиімді үйлестіру инфляцияны тұрақтандырудың, экономикалық тоқыраудың алдын алудың және орнықты өсуді қамтамасыз етудің негізгі тетігі болып табылады.

Дөңгелек үстелге орталық және жергілікті атқарушы органдардың өкілдері, сарапшылар мен ғалымдар қауымдастығының мүшелері, сондай-ақ Академияның магистранттары мен докторанттары қатысты.

Баяндамашылар қатарында Л.Н. Гумилев атындағы Еуразия ұлттық университетінің директорлар кеңесінің төрағасы Жақсыбек Құлекеев, ҚР Ұлттық экономика бірінші вице-министрі Азамат Амрин, ҚР Қаржы вице-министрі Ержан Біржанов, ҚР Ұлттық банкінің Ақша-несие саясаты департаментінің директоры Рүстем Оразалин, ҚР Жоғары аудиторлық палатасының Талдау және есеп департаментінің директоры Нұрлан Катренов, қаржы сарапшысы Расул Рысмамбетов және «Астана» халықаралық университетінің профессоры Серік Жұмабаев бар.

Спикерлер мемлекеттік экономикалық саясатты жетілдіруде кәсіби пікір алмасу мен сараптамалық бағалаулардың маңыздылығын атап өтті. Талқылаудың негізгі бағыттарының бірі – фискалдық жүктеме, инфляциялық тәуекелдер және бюджеттік шығындардың тиімділігі болды.

ҚР Ұлттық экономика бірінші вице-министрі Азамат Амриннің айтуынша, биыл наурыз айында жаңа Бюджет кодексі қабылданды. Оны әзірлеудің алдында 2008 жылғы Кодекстің Халықаралық валюта қорының стандарттарына сәйкестігіне бағалау жүргізілген.

«Халықаралық сарапшылардың ұсынымдары жаңартылған Бюджет кодексінің негізіне алынды. Оның нормалары 2026–2028 жылдарға арналған республикалық бюджетті қалыптастыру және он жылдық даму болжамын әзірлеу кезінде қолданылды. Алғаш рет шығыстардың өсу қарқыны экономиканың әлеуетімен және нысаналы инфляция деңгейімен нақты байланыстырылды: бюджет ережелеріне сәйкес, олар 2026 жылы – 108,7%, 2027 жылы – 109,1%, ал 2028 жылы – 109,3% мөлшерінде болады. Бұл көрсеткіш реформаларға дейінгі 121% деңгейінен төмен. Сонымен қатар Ұлттық қордан берілетін кепілдендірілген трансферт 2026–2028 жылдары жыл сайын 2,77 трлн теңге мөлшерінде белгіленді, ал нысаналы трансферт тарту көзделмеген», – деп атап өтті Азамат Амрин.

Іс-шара мемлекеттік органдар, ғылыми орта мен білім беру саласы арасындағы ынтымақтастықты нығайтуға және аналитикалық пікір алмасуға арналған тиімді алаңға айналды.

Диссертация тақырыбы: «Қазақстан Республикасында әлеуметтік қақтығыстардың алдын алу және басқару контекстіндегі мемлекеттік қызметшілердің кәсіби құзыреттерін жетілдіру».

Зерттеу жұмысында әлеуметтік қақтығыстардың алдын алу мен тиімді басқаруға қажетті құзыреттер ұсынылды. Сонымен қатар нақты кейстер мен мемлекеттік қызметшілер арасындағы әлеуметтік сауалнама нәтижелері негізінде маңызды қорытындылар мен ұсыныстар талқыға салынды.

Атап айтқанда, «Ақтөбе десант» пилоттық жобасы мемлекеттік басқарудың үлгісі ретінде сипатталып, өзге де елімізде орын алған әлеуметтік қақтығыстар, дағдарыстық жағдайдағы мемлекеттік қызметші құзыреті талданды.

Диссертациялық жұмыс Қазақстан Республикасы ішкі саясатының негізгі қағидаттарын, құндылықтары мен бағыттары туралы 2025 жылғы 5 қарашада Мемлекет басшысы бекіткен құжатпен үндеседі. Мемлекет басқару ісінде қоғаммен сапалы диалог құру ұлтты одан әрі ұйыстырады.

Зерттеуге ғалымдар тарапынан «Халық үніне құлақ асатын мемлекет», «Адал азамат» қағидаттарына сәйкес жүргізілген сапалы жұмыс деген баға берілді.

Қазақстан Республикасы Парламенті Сенатының депутаты Нурия Ниязова Мемлекеттік басқару академиясының қызметкерлері, магистранттары мен докторанттарына арналған кәсіби және тұлғалық дамуға бағытталған «Даму күні» жобасы аясында дәріс оқыды.

Шара барысында сенатор 2026 жылғы 1 қаңтардан бастап күшіне енетін Салық кодексіндегі негізгі жаңалықтар жөнінде баяндама жасады. Ол корпоративтік және жеке табыс салығының мөлшерлемелеріндегі өзгерістерге, арнайы салықтық режимдерді оңтайландыруға және салықтық әкімшілендіруді жетілдіру шараларына тоқталды.

Нурия Ниязованың айтуынша, енгізілген өзгерістердің басты мақсаты – салық жүйесін жеңілдету, әкімшілік жүктемені азайту және тұрақты экономикалық өсім үшін қолайлы жағдай жасау.

«Тиімді салық саясатын қалыптастыру кәсіпкерлікті дамытуға, инвестициялық белсенділікті арттыруға және азаматтардың өмір сапасын жақсартуға тікелей әсер етеді. Айта кетерлік жайт, жаңа Кодексте әлеуметтік маңызы бар салалар мен нақты экономиканы қолдауға басымдық сақталып отыр», – деді сенатор.

«Даму күні» жобасы академиялық ортада пікірталас мәдениетін дамытуға, білім алушыларды сараптамалық талқылауларға тартуға және мемлекеттік пен қоғамдық институттар арасындағы байланысты нығайтуға бағытталған. Қатысушылар кездесудің практикалық маңыздылығын және заң шығару тармағы өкілімен тікелей пікір алмасу мүмкіндігін жоғары бағалады.