Page 8 - Dissertation (3)

Искиндирова, Ж., Бактиярова, Г., Айжарықов, Н., Балманова, А. өз
кезегінде батыс өңірлерде жүргізілген зерттеуінде мемлекеттік қызметтегі
негізгі байланыс арналары: жеке кездесулер, телефонмен байланыс және
жазбаша жауап екенін атап көрсетеді. Осы коммуникация үдерісінде түрлі
психологиялық және ақпараттық кедергілер туындайтыны анықталған [14].
Боқаев Б.Н., Балманова Ә.А., Садыкова К.К. зерттеуінде мемлекеттік
қызметшілердің коммуникативтік құзыреттері заңнамада нақты көрсетілмегені
айқындалады. Шетелдік тәжірибеге сүйене отырып, авторлар ашықтық пен кері
байланысты қамтамасыз ететін кәсіби модель ұсынады [15].
Осы айтылған зерттеулердің нәтиіжесінде туындаған жалпы ортақ
қорытынды мемлекеттік қызметшілердің коммуникативтік құзыреттерін дамыту
мемлекеттік қызметтің тиімді жұмыс істеуінің және мемлекеттік функцияларды
табысты жүзеге асырудың ажырамас маңызды бөлігі екендігі. Елімізде және
шетелде жүргізілген тиісті зерттеулер мемлекеттік қызметтің деңгейі мен
функционалдық мүмкіндіктеріне байланысты коммуникациялық құзереттерге
деген нақты қажеттіліктерді ескере отырып, мемлекеттік қызметшілерге
арналған сараланған білім беру бағдарламаларын құру қажеттілігін айрықша
атап өтеді.
Зерттеудің мақсаты мен міндеттері. Бұл зерттеудің мақсаты - «Халық
үніне құлақ асатын мемлекет» тұжырымдамасын іске асыру контекстінде
мемлекеттік қызметшілердің кәсіби коммуникативтік құзыреттерін жетілдіру
бойынша ұсыныстар әзірлеу.
Осы мақсатқа жету жолында мынадай міндеттер алға тартылды:
1. Мемлекеттік қызметшілердің кәсіби коммуникациялық құзыреттерінің
мәні мен негізгі құрамдас бөліктерін, оның ішінде цифрлық, мәдениетаралық,

дағдарыстық және басқа да коммуникация аспектілерін ашып көрсету.
2. Мемлекеттік қызмет саласындағы кәсіби коммуникациялық
құзыреттерді қалыптастыру мен дамытудың қолданыстағы әдістемелік
тәсілдерін жүйелеу.
3. Қазақстан Республикасының қолданыстағы заңнамасы шеңберінде
мемлекеттiк қызметшiлерге қойылатын бiлiктiлiк талаптарын коммуникация
саласындағы талаптармен байланыстыра отырып талдау.
4. Клиентке бағдарланған және диалогтық басқару модельдерін енгізу
аясында кәсіби коммуникациялық құзыреттерді дамытудың халықаралық
тәжірибесіне салыстырмалы талдау жүргізу.
5. «Халық үніне құлақ асатын мемлекет» тұжырымдамасын және
мемлекеттік қызметтердің цифрландырылуын ескере отырып, мемлекеттік
қызметшілердің коммуникативтік құзыреттерін дамытуға бағытталған оқу
бағдарламаларын зерттеу.
6. Қазақстандық тәжірибе негізінде, әсіресе дағдарыстық жағдайларда,
мемлекеттік қызметшілер мен азаматтар арасындағы коммуникациядағы негізгі
кедергілер мен проблемаларды анықтау.

8