Page 5 - Dissertation (3)

Зерттеліп отырған мәселе Қазақстан Республикасы Президентінің
Жолдауында бекітілген және мемлекеттік саясаттың негізін құрайтын «Халық
үніне құлақ асатын мемлекет» моделін жүзеге асыру жағдайында ерекше өзекті
бола бастады. Бұл тұста «Халық үніне құлақ асатын мемлекет»
тұжырымдамасының ережелеріне сәйкес жүйелі кері байланыс, мемлекеттік
органдардың белсенді әрекеті және азаматтардың шешім қабылдауға қатысуы
негізгі бағдар болып табылады [4]. Халықпен тиімді коммуникация мемлекеттік
басқарудың маңызды құрамдас бөлігіне және оның сапасының негізгі
көрсеткіштерінің біріне айналды.
Осыған орай, Мемлекеттік басқаруды дамытудың 2030 жылға дейінгі
тұжырымдамасының ережелерінде мемлекеттік басқаруды жаңғыртудың
стратегиялық бағыттарының бірі мемлекеттік сектордағы адами капиталдың
сапасын арттыру, оның ішінде мемлекеттік қызметшілердің басқарушылық,
цифрлық және коммуникациялық дағдыларын дамыту болып табылатыны атап
көрсетілген [5]. Тұжырымдамада тұтынушыға бағдарланған мәдениетті
қалыптастыруға және жоғары сапалы қызмет көрсету және ашық өзара
әрекеттесу арқылы азаматтардың мемлекеттік мекемелерге сенімін қамтамасыз
етуге баса назар аударылған.
Сонымен қатар, Қазақстан Республикасының мемлекеттік қызметін
дамытудың 2025–2029 жылдарға арналған тұжырымдамасында
коммуникациялық құзыреттерді дамыту эмпатияға және азаматтардың
қажеттіліктеріне назар аударуға негізделген мінез-құлық тәсілдерін енгізу
міндеттерімен тікелей байланысты [6]. Құжатта заманауи мемлекеттік
қызметшілер тек нормативтік актілерді орындаушы ғана емес, сонымен қатар
қоғаммен диалогтың белсенді демеушісі болуы керектігі атап өтілген.

Әлеуметтік желілермен, цифрлық арналармен және дағдарыстық
коммуникациялармен жұмыс істеу дағдыларын қоса алғанда, азаматтармен
қарым-қатынас стилін цифрлық түрлендіру қажеттілігі ерекше атап өтілді.
Мемлекеттік қызметшілердің коммуникативтік дағдысын жетілдіру
мәселесі елімізде қабылданған тағы басқа ірі мемлекеттік құжаттар аясында, атап
айтқанда «2023-2029 жылдарға арналған цифрлық трансформация, ақпараттық-
коммуникациялық технологиялар саласын және киберқауіпсіздікті дамыту
тұжырымдамасы» мен Мемлекет пен қоғамның өзара іс-қимылын жетілдіру
стратегиясында бекітілген «Халық үніне құлақ асатын мемлекет» моделін жүзеге
асыру барысында анықталған айрықша басымдықтардың бірі екендігін атап кету
керек [7]. Сондай-ақ, «Халық үніне құлақ асатын мемлекет» моделінің
қағидаттары мемлекеттік органдардың дәстүрлі коммуникациядан бастап
цифрлық платформаларға дейінгі конструктивті және өнімді өзара іс-қимылды
қамтамасыз етуге бағытталған әртүрлі коммуникация арналары, азаматтарды
саяси шешімдерді қабылдау процесіне атсалысуына жол ашуды міндеттейді.
Сәйкесінше мемлекеттік органаһдар мен олардың қызметкерлері түрлі
дағдарыстық жағдаяттарға қарамастан қоршаған қоғаммен үдайы және тиімді
коммуникациясын сақтап отыруы көзделеді.

5