Page 2 - Dissertation (3)

қызметтерді электронды форматқа көшіру цифрлық құралдарды пайдалана
білуді және онлайн-коммуникацияны меңгеруді талап етеді.
COVID-19 пандемиясы сияқты дағдарыстық кезеңдер жылдам және
сапалы коммуникацияның қажеттілігін көрсетті, ол қоғамдық пікірді
қалыптастыруға, әлеуметтік наразылықты алдын алуға және дауларды шешуге
ықпал етеді.
Осылайша, мемлекеттік қызметшілердің коммуникативтік құзыреттерін
жетілдіру мемлекет пен қоғамның тиімді өзара іс-қимылының қажетті шарты
болып табылады. «Халық үніне құлақ асатын мемлекет» моделін, мемлекеттік
басқаруды дамытудың 2030 жылға дейінгі тұжырымдамасын, сондай-ақ 2023–
2029 жылдарға арналған цифрлық трансформация, ақпараттық-
коммуникациялық технологияларды және киберқауіпсіздікті дамыту
тұжырымдамасын іске асыру заманауи тұжырымдамалық модельдер мен
бағдарламаларды әзірлеуді талап етеді. Бұл өз кезегінде азаматтардың сенімін,
мемлекеттік қызметтердің сапасын және мемлекет пен қоғам арасындағы
коммуникация деңгейін арттырады.
Диссертациялық зерттеу нысаны – мемлекеттік қызметшілердің
кәсіби құзыреттері.
Диссертациялық зерттеу пәні - «Халық үніне құлақ асатын мемлекет»
тұжырымдамасын іске асыру контекстіндегі мемлекеттік қызметшілердің
коммуникативтік құзыреттері, оларды қалыптастыру және жетілдіру
үдерістері.

Зерттеудің мақсаты – «Халық үніне құлақ асатын мемлекет»
тұжырымдамасын іске асыру контекстінде мемлекеттік қызметшілердің
кәсіби коммуникативтік құзыреттерін жетілдіру бойынша ұсыныстар әзірлеу.
Зерттеу мақсатына қол жеткізу үшін келесі міндеттер белгіленді:
− мемлекеттік қызметшілердің кәсіби коммуникациялық құзыреттерінің
мәні мен негізгі құрамдас бөліктерін, оның ішінде цифрлық, мәдениетаралық,
дағдарыстық және басқа да коммуникация аспектілерін ашып көрсету;
− мемлекеттік қызмет саласындағы кәсіби коммуникациялық
құзыреттерді қалыптастыру мен дамытудың қолданыстағы әдістемелік
тәсілдерін жүйелеу;
− Қазақстан Республикасының қолданыстағы заңнамасы шеңберінде
мемлекеттiк қызметшiлерге қойылатын бiлiктiлiк талаптарын коммуникация
саласындағы талаптармен байланыстыра отырып талдау;
− клиентке бағдарланған және диалогтық басқару модельдерін енгізу
аясында кәсіби коммуникациялық құзыреттерді дамытудың халықаралық
тәжірибесіне салыстырмалы талдау жүргізу;
− «Халық үніне құлақ асатын мемлекет» тұжырымдамасы мен
мемлекеттік қызметтердің цифрландыруын ескере отырып, мемлекеттік
қызметшілердің коммуникативтік құзыреттерін дамытуға бағытталған білім
беру бағдарламаларын зерттеу;