Page 1 - Dissertation (3)

«8D04113 – Мемлекеттік басқару» білім беру бағдарламасы бойынша
экономика докторы дәрежесін алуға ұсынылған «Халық үніне құлақ
асатын мемлекет» тұжырымдамасы негізінде мемлекеттік
қызметшілердің кәсіби коммуникативтік құзыреттілігін жетілдіру»
тақырыбындағы Қазақстан Республикасы Президентінің жанындағы
Мемлекеттік басқару академиясының докторанты Балманова Асель
Аманбековнаның диссертациялық жұмысына
АҢДАТПА

Зерттеу тақырыбының өзектілігі: Тұрақты жаһандық және
әлеуметтік өзгерістер жағдайында мемлекеттік қызметшілердің
коммуникативтік құзыреттерін жетілдіру мемлекеттік органдардың тиімді
қызмет атқаруының негізгі шарты болып табылады. Қазақстанда бұл
тақырыптың өзектілігі мемлекет пен азаматтар арасындағы өзара іс-қимылды
жақсартуға және мемлекеттік қызмет көрсету сапасын арттыруға бағытталған
реформалар арқылы күшейіп отыр.
2012 жылғы 14 желтоқсандағы Қазақстан Республикасы Президентінің
Жарлығымен бекітілген «Қазақстан-2050» стратегиясы және 2015 жылы
қабылданған «Қазақстан Республикасының мемлекеттік қызметі туралы» Заң
мемлекет пен қоғамның тиімді өзара әрекеттесуін дамытуға бағытталған
шараларды, соның ішінде мемлекеттік қызметшілердің кәсіби біліктілігін
арттыру, олардың құзыреттерін дамыту, мемлекеттік қызмет көрсету сапасын

жақсарту және қажетті коммуникативтік дағдыларды қалыптастыруды
қарастырады.
Ресми деректерге сәйкес, мемлекеттік органдардың қызметіне көңілі
толмайтын азаматтардың саны ұдайы өсуде: 2023 жылы аталған мәселе
аясында шамамен 11 мың құқық бұзушылық тіркелген (2022 жылмен
салыстырғанда 11 есе көп), соның шеңберінде 95 қызмет алушының құқығын
қорғау шаралары қабылданған (2022 жылмен салыстырғанда 2,5 есе көп).
Негізгі проблемалар – ақпараттың сенімсіздігі, өтініштерді қараудың төмен
сапасы және халықпен жеткілікті диалогтың болмауы.
«Халық үніне құлақ асатын мемлекет» тұжырымдамасы аясында жүйелі
кері байланыс пен азаматтардың шешім қабылдау процесіне қатысуы басты
басымдыққа ие болуда. 2030 жылға дейінгі мемлекеттік басқаруды дамыту
тұжырымдамасы мемлекеттік қызметшілердің басқарушылық, цифрлық және
коммуникациялық құзыреттерін жетілдіруді қоса алғанда, адами капиталдың
сапасын арттыруға бағытталған. Мемлекеттік қызметті дамытудың 2025–2029
жылдарға арналған коммуникациялық құзыреттерді эмпатиямен, цифрлық
форматтағы коммуникациямен, әлеуметтік желілердегі жұмыспен және
дағдарыстық коммуникациялармен байланыстырады. Сондай-ақ,
коммуникация 2023-2029 жылдарға арналған цифрлық трансформация,
ақпараттық-коммуникациялық технологиялар саласын және
киберқауіпсіздікті дамыту тұжырымдамасындағы басымдықтың бірі болып
табылады: мұнда өзара әрекеттесуді дәстүрлі және цифрлық платформалар
арқылы жүзеге асырудың маңыздылығы көрсетілген. Мемлекеттік